O PSdeG-PSOE de Xinzo de Limia úrxelle ao Concello a que proceda a buscar financiamento para a creación do novo museo de Carlos Casares na localidade.
Os socialistas denuncian que cinco meses despois de producirse o cambio de goberno, o proxecto “non está nin redactado, nin tampouco teñen claro onde van a buscar o financiamento necesario para a súa execución”.
A voceira do PSdeG-PSOE, Elvira Lama Fernández, acusa ao goberno de Amador Díaz e do Partido Popular de “desentenderse dos proxectos culturais ambiciosos, como é a creación do novo museo de Carlos Casares, no edificio mercado para tal fin o pasado mes de maio polo anterior goberno encabezado polos socialistas”.
Dende o grupo municipal socialista de Xinzo de Limia lembran que o proxecto, tal e como está reflectido na memoria, “serviu de base para acometer a compra dun inmoble na Praza Maior da vila, que ademais de servir para o museo, empregaríase tamén como punto de información turística de todo o concello e da comarca”.
Amador Díaz, alcalde de Xinzo, comentou que “hai unha compra dun edificio de 400.000 euros que o Concello non pode asumir. Temos que buscar a financiación, estamos traballando niso para sacar o proxecto adiante”.
