Dentro do plan impulsado polo Concello de Vilar de Barrio, en colaboración coa Secretaría Xeral de Igualdade, para promover diferentes obradoiros para educar na igualdade e na non discriminación por xénero, o escultor limiao Lois Carrera acaba de terminar neste municipio unha escultura na honra das mulleres. "A escultura vaise chamar Lieders, en homenaxe ao primeiro manifesto feminista de Galicia e que foi escrito por Rosalía de Castro cando tiña soamente 19 anos. Tátase de varias caras de mulleres e quixemos plasmar permanentemente con elas a reivindicación da muller e do seu papel na sociedade", explicou o alcalde de Vilar de Barrio, Manuel Conde, quen precisou que o lugar escollido para ubicar a escultura foi o centro do pobo co obxectivo de darlle unha maior visibilidade. "Imos a facer un calendario coa fotografía da escultura e cun texto baseado en Lieders, un manifesto no que Rosalía de Castro apelou á igualdade entre homes e mulleres, á liberdade do xénero femenino, así como á súa capacidade intelectual en igualdade de condicións en comparación co masculino. É moi curioso, moi bonito e moi revelador tendo en conta a época que era", asegurou o rexedor de Vilar de Barrio.
O Concello perfila a data na que se inaugurará a creación de Carrera e que rondará, previsiblemente, o vindeiro 21 de decembro. "Queremos ter no acto a dúas veciñas de cada un dos pobos do concello e intentarei que os alcaldes e alcaldesas da comarca nos arroupen no acto", asegurou o alcalde de Vilar de Barrio. "Vai a ser un acto moi sinxelo porque non se pode facer moito máis", engadiu.
A Secretaría Xeral de Igualdade colaborou con 8.000 euros neste proxecto de sensibilización para a sociedade de Vilar de Barrio.