Vilar de Barrio mellorará nos próximos meses o seu servizo de abastecemento grazas a un investimento de 50.000 euros sufragado pola Consellería de Infraestruturas.
Augas de Galicia vén de adxudicar o proxecto, que se prolongará durante tres meses, á empresa Construcciones y Almacenes Manuel Viso e Hijos, S.L. Centrarase, concretamente, en Barrán, Vilar de Barrio e Bóveda.
Con esta actuación preténdese emendar a escaseza de auga potable en época estival nos citados núcleos co obxectivo de garantir a dispoñibilidade deste recurso nos momentos de maior consumo. Para este fin, a nova rede conectará os depósitos reguladores existentes nas proximidades de Barrán, Vilar de Barrio e Bóveda co obxectivo de facilitar o aproveitamento dos sobrantes do primeiro deles, situado a maior cota, e reforzar os outros dous, sobre todo en época estival.
Actualmente, os depósitos de Barrán e Vilar de Barrio abastecen de auga potable a ambos os dous núcleos, mentres que o de Bóveda abastece ao propio núcleo e ao de Vilar de Gomareite, funcionando os tres depósitos de maneira independente entre si.
As obras contratadas por Augas de Galicia consistirán, dunha banda, na interconexión dos depósitos de Barrán e de Vilar de Barrio e, doutra banda, o proxecto prevé a interconexión dos depósitos de Vilar de Barrio e Bóveda. Neste tramo instalarase unha nova condución de abastecemento de 588 metros de lonxitude, apuntaron dende a Consellería.
