Un total de 15 persoas desempregadas dos concellos de Xinzo de Limia e Baltar formáronse profesionalmente nos últimos nove meses grazas a dous obradoiros -un de albanelería e outro de instalación en mantemento de xardíns e zonas verdes- promovidos dende a Consellería de Economía, Emprego e Industria. Para esta finalidade, o departamento autonómico fixo unha achega de 225.000 euros que serviu para que o alumnado accedera a un posto de traballo durante todo este tempo.
No concello de Xinzo de Limia, os participantes neste programa realizaron unha delimitación física na parte este e norte do Parque da Alameda do Toural, así como outra no parque Ponte da Lima, onde instalaron un rego automático e plantaron árbores e flores.
Por outra banda, no concello de Baltar os labores consistiron en podas, limpezas, desbroces e pintado de barandas en diversas localidades, e tamén en reparacións de filtracións e asentado do muro da estrada que une Sampaio e Sabucedo. Tamén se limpiou o exterior do Centro de Saúde do Concello.
