O Concello de Xinzo, da man do Instituto para la Diversificación y Ahorro de la Energía -IDAE- solventará unha das cuestións máis urxentes deste municipio como é o paso á iluminación de baixo consumo e a mellora da calidade da mesma.
A Administración Local vén de acadar unha subvención de 1,5 millóns de euros para poder renovar 4.610 luminarias antigas introducindo luces de tecnoloxía Led. O Concello de Xinzo, pola súa banda, aportará para este proxecto outros 375.000 euros e, nos vindeiros 15 días, deberá presentar toda a documentación esixida polo propio IDAE para confirmar a axuda aprobada por este organismo nacional.
Tal e como informaron dende o Concello de Xinzo, a actuación, que se desenvolverá nun periodo de dous anos e a través de sete proxectos, suporá o cambio das lámpadas de todo o alumeado público do termo municipal, tanto da vila como dos 32 núcleos de poboación. O aforro total será de case un 70 por cento sobre a factura actual anual, que se eleva ata preto de 258.500 euros. Ademais, segundo precisaron dende o Consistorio, as actuais luminarias municipais son de 100 vatios "e apenas iluminan", o que é "motivo frecuente de queixas" entre a veciñanza. "O Concello nunca pedira estas axudas, así que considero que foi un gran éxito que nos aprobaran todos os proxectos presentados. Será a forma de recuperar o tempo perdido na renovación das vellas lámpadas por outras máis sostibles", explicou Elvira Lama.