O popular Manuel Garrido afronta o seu segundo -e derradeiro- mandato con ilusión e con confianza para mellorar o municipio. O PSOE ten dous edís e o BNG, un.
Como afronta o mandato?
Con ilusión e con confianza de mellorar porque, máis dificultades das que tivemos ata agora, non imos ter. Persoalmente, como é o último, tratarei de facelo o mellor posible, con educación e bo trato. Non me gustaría que ninguén dirixíseme a orquestra. Non me gusta que o fagan os do meu partido, tampouco os demais.
Por que o deixa?
Pola idade e porque penso que debe de haber renovación. Aquí parece que, a quen lle vai ben, non se vai nunca; e a quen lle vai mal, abúrrese, pero tampouco se vai. Eu penso que hai que deixar sitio á xente que ten gañas e lle gusta.
Cales son as vantaxes de vivir na Merca?
Tranquilidade, natureza, proximidade. De cara aos vindeiros catro anos imos mellorar o tema da seguridade, a encamiñar o tema urbanístico regularizando a nova zona industrial en Matosiños, combater o feísmo, mellorar e manter os servizos. Reforzar a cultura e estreitar lazos co asociacionismo. Estar nunha asociación é un acto de sacrificio, merecen todos os meus respectos e, no básico, nos debería unir o interese xeral. Igual que na comarca: acadar que a autovía acabe en Viana do Castelo e, todo o demais, son historias.
Como revertir o peche de negocios no rural?
O problema da hostalería veu da falta de relevo xeracional. Unha maneira de reactivala é a declaración xacobea do Camiño de San Rosendo. Non teño dúbidas de que, si algún camiño está ben documentado, é este. A declaración axudaría a reactivar a hostalería e tamén a outros sectores co tema das rehabilitacións. Co respecto aos negocios que pecharon, debemos facilitarlles a tramitación deses cambios legais, desas reformas urbanísticas, para adicarse a outra actividade.
E no eido turístico?
Seguiremos a fomentar a oferta na Broa, intervir no conxunto de hórreos da Merca, temos orzamento para arranxar un caso de feísmo en Parderrubias e acondicionaremos o muro da igrexa da Mezquita. Tamén temos un proxecto moi bonito con Barbadás e San Cibrao que marcará un punto de inflexión no saneamento do río.