O secretario xeral de Cultura, Anxo Lorenzo, presentou hoxe a exposición "As miñas cousas en observación", a primeira retrospectiva de Chelo Matesanz en España.
Trátase dunha mostra de máis de cen pezas da artista desde os seus primeiros traballos a principios dos noventa até a actualidade, entre as que se encontran obras nunca expostas e unha instalación específica para as salas do Centro Galego de Arte Contemporánea (CGAC).
A Consellería de Cultura sinala nun comunicado que a artista "cuestiona as categorías e os xéneros tradicionais da arte, pondo en dúbida as habilidades técnicas e conceptos como a xenialidade do artista e a orixinalidade da obra de arte".
Explica que as salas do CGAC acollen esculturas, vídeos, pinturas, instalacións, costuras e collages distribuídos en "territorios metafísicos diferenciados que atenden a cuestións fundamentais e recorrentes na obra da artista", con temas como a infancia, a violencia, o fume ou a sexualidade.
Chelo Matesanz (Reinosa, Cantabria, 1964) é profesora titular de Pintura na Facultade de Belas Artes de Pontevedra, onde impartiu docencia nos últimos vinte anos.
