A Asociación Galega de Editores (AGE) pediu hoxe de maneira 'urxente', no marco do VIII simposio 'O libro e a lectura', unha nova lei de propiedade intelectual acorde cos usos da sociedade dixital, que facilite o equilibrio entre a divulgación da cultura e a súa retribución.
Os editores galegos informaron nun comunicado das conclusións deste simposio, centrado este ano na 'Propiedade intelectual na sociedade dixital' e celebrado onte e hoxe no Consello da Cultura Galega.
Entre elas, a AGE explica que o sector do libro galego asume un novo contexto dunha sociedade dixital con mudanzas para a industria cultural, polo que avogou por facer un esforzo por entender estas transformacións e adaptarse a elas, para o que propón unha nova forma de entender a propiedade intelectual.
'Desde a AGE -alega- vemos a necesidade de desenvolver fórmulas que garantan os lexítimos dereitos da propiedade intelectual, que son a base do funcionamento da industria do libro e da creación, e queremos facelo consensuadamente e sen lesionar os dereitos dos usuarios, favorecendo de forma especial o dereito á nova educación líquida que responde a un novo tempo'.
En definitiva, continúan os editores, trátase de encontrar o equilibrio entre a divulgación da cultura e o dereito á retribución que garante a propiedade intelectual, para o que demandan dos políticos a 'urxente' elaboración dunha nova lei de propiedade intelectual.
