'Primeiras civilizacións, Exipto e Mesopotamia no Museu de Montserrat' é o título da exposición inaugurada hoxe na Coruña que mostra parte da gran colección arqueolóxica que atesoura a galería catalá.
A montaxe, instalada na sede da Fundación Novacaixgalica, recolle os mellores exemplos das culturas mesopotámica e exipcia e ofrece unha viaxe pola arte antiga a través de 118 pezas arqueolóxicas de enorme valor histórico.
Para a inauguración da mostra viaxou ata a Coruña o padre Josep Laplana, director do Museu de Montserrat, quen, xunto á directora da Fundación Novacaixagalicia, Teresa Porto, presentou nunha rolda de prensa a exposición.
'Nunca antes se puido ver en Galicia unha montaxe tan extensa e completa, e de tan altísima calidade, sobre arte antiga', sinalou Porto, quen lle agradeceu ao Museu de Montserrat a cesión destas pezas.
A arqueoloxía do Oriente Próximo foi o núcleo xerminal do Museu de Montserrat cando este se instituíu en 1962 ao reunir os mellores materiais arqueolóxicos do antigo Museo Bíblico e as mellores obras pictóricas e escultóricas do mosteiro desde o século XIII e ata a modernidade.
Gran parte das pezas que se destacan nesta exposición foron adquiridas polo pai Bonaventura Ubach (1879-1960) no Cairo e nos anticuarios de Beirut, Damasco, Bagdad e outros lugares co fin de ilustrar o mundo cultural da biblia.
O traballo deste monxe, eminente orientalista e viaxeiro do primeiro terzo do século XX, enriqueceuse despois con outras importantes achegas que complementan e amplían os primeiros obxectivos da colección arqueolóxica de Montserrat que agora abarca a prehistoria, as culturas clásicas, as asiáticas e as precolombianas.
Os cento dezaoito elementos da mostra inaugurada na Coruña, entre os que figuran sarcófagos, máscaras, ollas, ánforas, vasos e todo tipo de útiles e abalorios, pertencen ás culturas mesopotámica (52 pezas) e exipcia (outras 66), e son, sen dúbida, as máis emblemáticas da colección do Museu de Montserrat, segundo destacou o padre Laplana.
Completa a montaxe unha sección non relacionada coa colección custodiada na Santa Montaña.
Así, os visitantes poderán coñecer antes de abandonar a exposición os interesantes achados realizados por un equipo de arqueólogos da Universidade da Coruña dirixida polo profesor Juan Luis Montero Fenollós en dous proxectos aínda en marcha, un sobre a torre de Babel e outro sobre o Proxecto Arqueolóxico Medio Eufrates Sirio.
Exipto e Mesopotamia son dúas das grandes culturas que se desenvolveron hai máis de seis milenios.
O fenómeno que posibilitou o desenvolvemento das primeiras culturas urbanas nestas dúas zonas foi a presenza de auga, grazas ao Nilo en Exipto e ao Tigris e o Eufrates en Mesopotamia, que foron os motores das grandes civilizacións urbanas que xurdiron a principios do neolítico.
