A dirección do grupo Sargadelos convocou os representantes dos traballadores a unha reunión prevista para este luns, día 11, nas instalacións que a empresa posúe en Santiago de Compostela, co fin de comezar o período de consultas do expediente de regulación de emprego (ERE) presentado, dentro dun plan de viabilidade para os seus dous centros, en Cervo (Lugo) e Sada (A Coruña), onde traballan un total de 172 persoas. Os despidos previstos afectan a 70 empregados.
A empresa comunicou aos sindicatos a aprobación no consello de administración do devandito plan de viabilidade e pediu a pasada semana aos sindicatos que nomeasen aos seus representantes para a mesa de negociación. Os dous comités de empresa acordaron, por separado, en senllas reunións, pedir á dirección negociar os despedimentos de forma independente.
O comité de empresa de Cervo decidiuno o pasado martes e o da planta de cerámicas O Castro, en Sada, este xoves, optou polo mesmo. As dúas representacións sindicais trasladaron a Sargadelos un total de 10 nomes -cinco de cada centro- que conformarán a comisión negociadora, que o luns afronta, pois, a súa primeira cita.
'Haberá que presentar as posturas e que responda a empresa sobre a solicitude de negociar por separado', comentou, en declaracións a Europa Press, o representante da área de cerámica de CC.OO. Carlos Pérez, que prevé asistir ao encontro.
Por agora, constata, as organizacións sindicais só coñecen a intención de acometer un despedimento colectivo, que podería afectar a 70 traballadores.
Ademais, critica que 'está claro que o comezo da negociación non foi bo' posto que a empresa presentou un preconcurso de acredores -este mércores- 'e a parte social non tiña coñecemento disto'. 'A boa fe non existe', lamenta.
No último comunicado remitido, a empresa sinala que o plan de viabilidade prevé agora 'medidas contundentes' para adaptar os gastos 'á realidade das vendas actuais da empresa'.
O principal problema, agrega, atópase en que os custos de persoal 'chegaron mesmo a superar a cifra de vendas'. As medidas tomadas no pasado, fundamentalmente ERE temporais, 'non foron suficientes' e a sociedade 'a vai obrigada a acometer unha importante reestruturación de persoal nos seus dous centros produtivos para adecuar a produción á demanda', indica.
