O acusado de pertencer á organización terrorista Resistencia Galega A.M.P. negou este luns na Audiencia Nacional formar parte deste grupo e cualificou de "animalada" a utilización da violencia para conseguir a independencia ou outros fins políticos.
Así se expresou A.M.P. durante o xuízo no que se enfronta a unha petición fiscal de 18 anos de cárcere por presuntos delitos de pertenza a organización terrorista e tenza de explosivos.
O acusado asegurou non ter ningunha vinculación con movementos nacionalistas galegos e remarcou que en pleno século XXI o recurso á violencia é unha "animalada" e a utilización de explosivos é "unha barbaridade" polo risco que supón para a vida das persoas e dos bens.
Respecto ao seu arresto nunha casa abandonada en Ames (A Coruña), o procesado indicou que descoñecía que o material incautado fosen artefactos explosivos e engadiu que a ese monte acoden habitualmente os mozos para "estar con rapazas ou fumar porros".
Mosquera, que respondeu unicamente a preguntas da súa defensa, admitiu utilizar na súa xuventude o alcume 'Senlheiro', aínda que precisou que non o usaba en ningún grupo violento, senón para charlar e ligar coas rapazas nos chats.
Segundo a fiscal Ana Landeras, A.M.P., alcume 'Senlheiro', pertencía á 'Asemblea da Mocidade Independentista (AMI), unha asociación que cumpría coas directrices da organización terrorista Resistencia Galega.
O acusado foi detido nunha casa abandonada na aldea de O'Instrumento da localidade coruñesa de Ames, que a organización utilizaba como "lugar de comunicacións" e depósito de material.
O acusado foi sorprendido cando manipulaba uns termos metálicos, que resultaron ser artefactos explosivos con capacidade de causar "graves danos" en persoas e bens, segundo expón o escrito de conclusións provisionais do Ministerio Público.
Os tres artefactos intervidos eran "idénticos" aos incautados a outros membros do grupo terrorista. No domicilio do acusado, atopáronse varias cartas de contido persoal e político que lle foran remitidas dende varios cárceres por integrantes de Resistencia Galega e varios pasquíns co anagrama de AMI alentando á "xuventude á loita pola independencia de Galicia".
