O colectivo ecoloxista Adega denunciou que a Xunta levará o marisco contaminado, procedente das zonas C, á ría de Ferrol e a enseada de Aldán, ambas na Rede Natura pola excepcionalidade do seu medio mariño.
Os ecoloxistas resaltan nun comunicado que é o marisco para a súa descontaminación natural que a empresa Pescanova non quixo fronte á piscifactoría de Morás, e conseguiu que a Xunta mudase de lugar cando xa fora decidida aquela localización e publicada no Diario Oficial de Galicia (DOG).
Para a Adega, trátase doutro episodio de 'chantaxe corporativa' e 'submisión dunha administración aos intereses empresariais' e pregúntase se non sería mellor que a Xunta sanease as rías 'en lugar de andar mareando o marisco tóxico'.
Despois de lembrar que a maior parte dos polígonos marisqueiros galegos están considerados zonas 'C', non aptas para a comercialización directa, explica que o marisco que se extrae deles se sitúa nunhas instalacións flotantes en zonas limpas para a súa depuración natural.
O plan pretende depurar unhas 450 toneladas de moluscos con elevada contaminación fecal ao ano e a Xunta decidiu en xullo que se situasen en Morás (Lugo), mais en agosto o Executivo atendeu a reclamación da Pescanova, que dispón na zona dunha planta de rodaballo, e decidiu novas situacións, sinala a nota.
Estas son a zona exterior da ría de Ferrol e o polígono Cangas-A, en Aldán, que sons consideradas 'aptas para colocar a batea de reinstalación', aínda que os ecoloxistas agregan que se decidiu 'sen dispor de estudos científicos obxectivos e independentes sobre a efectividade deste tipo de prácticas e as posíbeis repercusións nos ecosistemas mariños'.
