O mozo que a enganou para que viaxase a España díxolle que traballaría limpando, e vendeuna por mil euros
A vista contra tres acusados de explotar sexualmente e coaccionar unha nova romanesa, á que obrigaron a exercer a prostitución en Vigo, saldouse cun acordo de conformidade no que se rebaixou substancialmente a petición de penas.
Segundo ese acordo, a Fiscalía acepta que Ionica B.R. sexa condenada a tres anos de cárcere polos delitos de trata de seres humanos con fins de explotación sexual e indución á prostitución. A pena de prisión substituirase por unha multa de 6.480 euros, á que se suma outra polo segundo delito, de 540 euros.
Daniel E., o mozo que convenceu a rapaza con enganos para que viaxase de Romanía a España, foi condenado a tres anos por trata de seres humanos e indución á prostitución, e a unha multa de 360 euros. Este acusado permanece en prisión dende o 1 de marzo de 2013.
Finalmente, Juan Valentín P.C. foi condenado a dous anos de prisión por trata de seres humanos con fins de explotación sexual, pero o seu avogado pedirá a suspensión de condena, xa que non ten antecedentes.
INDEMNIZACIÓN
Tras recoñecer os feitos e aceptar as condenas, os acusados deron tamén o visto bo ao pagamento dunha indemnización de 7.000 euros á vítima, por danos morais. Ese diñeiro xa está a disposición xudicial, posto que é a cantidade que foi intervida aos acusados durante a instrución da causa.
Inicialmente a Fiscalía pedía penas moito máis elevadas: 15 anos para Ionica e 16.200 euros de multa; 12 anos e medio para Juan Valentín, e multa de 13.500 euros; e 12 anos de cárcere para Daniel E., e multa de 10.800 euros.
FEITOS
Segundo o propio escrito de acusación, foi Daniel quen, estando en Romanía, coñeceu a vítima en xullo de 2012. Pouco despois, aproveitando que a moza, que entón tiña 18 anos, procede dunha familia numerosa humilde, en situación de especial vulnerabilidade, convenceuna para iniciar unha relación e para trasladarse a Vigo, onde supostamente traballaría axudando á madrasta deste (a acusada Ionica B.R.) nas tarefas de limpeza dun bar.
Cando a moza chegou a España, foi trasladada a un club de alterne do Casco Vello de Vigo, rexentado por Ionica e a súa parella, Juan Valentín, e foi obrigada a exercer a prostitución cada día, durante 12 horas, sen percibir pagamento económico ningún, xa que todo o que gañaba se destinaba a sufragar a débeda adquirida na viaxe (pagado por os seus explotadores).
VENDIDA POR MIL EUROS
Tras varias semanas, Daniel vendeu a rapaza a Ionica por mil euros, e a rapaza seguiu exercendo a prostitución para esta muller, que se negou a liberala alegando a existencia desa débeda, a pesar de que a vítima mostrou o seu desexo en varias ocasións de deixar esa actividade.
Como consecuencia do exercicio da prostitución, a rapaza contraeu varias enfermidades de transmisión sexual, que non foron tratados médicamente, ata que foi localizada por axentes da Brigada de Estranxeiría do Corpo Nacional de Policía. Ademais deses problemas físicos, a moza (que denunciou os feitos en Comisaría cando foi liberada) presenta unha síndrome de estrés postraumático grave.
