O BNG presentou unha iniciativa ante o Parlamento de Galicia para preguntarlle á Xunta que fai a Consellaría de Medio Rural e do Mar co marisco 'contaminado' e se llelo ofrece aos 'pobres', segundo un comunicado divulgado hoxe por esa formación.
Na nota, o deputado Bieito Lobeira indica que os resultados das análises efectuadas ao marisco 'reinstalado' nunha batea depuradora de Ferrol van acompañados dunhas 'anotacións' dun responsable da Xunta nas que pregunta sobre o seu destino: 'Vólvese sementar ou se lles dá aos pobres?'.
Por iso, pregunta se ese produto tóxico foi nalgunha ocasión ofrecido a entidades benéficas.
As análises na mencionada plataforma de cultivo de marisco mostran un 'elevado índice de contaminación que impide a súa comercialización', indica o deputado do BNG, que considera que esa iniciativa de intentar depurar é un 'fracaso'.
Segundo o parlamentario autonómico, xunto aos datos das análises hai unha serie de 'anotacións persoais da xefa de servizo de recursos mariños da Delegación territorial da Coruña nas que se le literalmente: 'curioso resultado, a fina e xaponesa de a pé de Barallobre a peor...A Coruña ben e Corcubión mal...que se fai coa de Corcubión?'.
