Galicia

Camiño de Santiago, unha ruta de solidariedade para nenos con membros amputados

Galicia

Camiño de Santiago, unha ruta de solidariedade para nenos con membros amputados

O Camiño de Santiago é, por iniciativa de Ionut Preda, deportista con discapacidade oriúndo de Romanía e establecido en España, unha ruta de solidariedade para nenos con membros amputados, aos que este home axuda no mundo real e virtual para que poidan encarar este transo e facer "vida normal".

Unha das súas pernas é ortopédica, e o prezo dun postizo pode moverse desde os 5.000 ata os 50.000 euros, unha razón por que decidiu involucrarse, tanto persoalmente como a través dun proxecto na internet, para axudar a todos os menores mutilados do planeta que por falta de diñeiro nas súas familias non contan cunha extremidade de substitución.

Con tan só oito anos, Ionut Preda, que na actualidade ten 34, sufriu un accidente mentres estaba con outros cativos xogando cun guindastre mecánico, feito que o levou a perder unha perna e que lle provocou un estado de inmobilidade perpetuo durante preto de dous anos.

Pero este suceso, por moi tráxico e conmovedor que pareza, marcoulle a vida. "Se non tivese o accidente, sería un máis", explícalle na praza do Obradoiro, e engade que ao volver a andar, coa axuda dunha prótese, sentiu que se lle concedera outra oportunidade, polo que nese momento se prometeu a si mesmo que axudaría os demais. "E iso estou facendo", sostén.

Desde o ano 2007, este home, que reside en Galicia, loce con orgullo e sen ningún tipo de pudor unha perna ortopédica que non lle impide pedalear axilmente sobre a bicicleta, en que mostra unha gran destreza, envexada por moitos.

Este medio de transporte e Ionut levan máis de trece anos sendo compañeiros inseparables: "É unha amizade verdadeira, honesta e leal".

"A fe move montañas, foi o meu caso", prosegue este afable atleta. Durante a súa vida practicou infinidade de deportes, -un dos seus "apoios e refuxios"-, talvez influenciado polo seu pai, boxeador, e a súa nai, ximnasta.

Vinte e seis anos despois de que un tráxico episodio marcase para sempre o destino deste deportista, Ionut Preda prepárase para os próximos xogos do Río de Xaneiro, en que espera participar na modalidade olímpica de halterofilia, xa que non en van é o "primeiro amputado" da historia que practica este deporte a nivel de competición.

"Teño bronce en Galicia na categoría de Olímpicos, e o ano pasado logrei o bronce no campionato de España de Universitarios que se organizou na Coruña".

Ionut bebe a vida, como fai calquera amante dos retos.

Por iso, a principios do próximo mes porá en marcha unha idea peculiar, unha canle de televisión pola internet que dará acubillo e amparo a catro proxectos seus nos que involucra os peregrinos.

Quen colabore con el será 'lacrado' cun selo exclusivo e especial: dous pés de nenos, un feito polo que Ionut Preda é coñecido xa como "o atrapa selos".

"Eu camiño e pedaleo para que outros poidan camiñar", manifesta Ionut Preda para explicar tanto a súa actitude vital, como a impresión que elixiu para os seus colaboradores, e a súa aventura de cooperación instaurada na rede e dividida en catro bloques sen nome común que os agrupe.

'Eu quero camiñar' é un proxecto pensado para obter próteses e os peregrinos serán os encargados de conseguir, mediante a venda de camisetas, diñeiro para lles sufragar aos máis pequenos a axuda que precisan.

'Enmanuel, un neno, un sorriso' é outro proposta de Ionut Preda ideada para que ningún menor quede sen lecer, polo que pretende distribuír xoguetes que lle vaian ofrecendo por todos os orfanatos da terra.

Outra liña de actuación, 'O Recuncho do Peregrino', permitiralles aos camiñantes contar as súas experiencias nesta aventura, e a cuarta, 'Club Paralímpico', integrada por doce persoas, acollerá a calquera que se queira sumar e que defenda a necesidade de facer e practicar deporte.

Este deportista pretende percorrer en breve as 52 provincias da xeografía española en 52 semanas, xusto as que ten un ano.

Cada sábado e domingo estará nunha, que elixirá ao azar a man inocente dun neno calquera que será o encargado de ir debuxando aos poucos o "camiño do seu destino".

"Eu só son unha ferramenta, e hai que deixar un legado xa que o proxecto é o importante", manifesta.

Ionut Preda é un "exemplo de vida" que percorre o Camiño de Santiago dando motivación e inspiración a todo aquel que se achegue e que o necesite, e a súa única "desvantaxe" é estar sen unha perna de carne e óso, circunstancia por que a xente o mira e "queda alucinada".

Pero con isto, apostila, ao final apréndese que non hai barreiras, ou que de habelas, existe forza máis que suficiente para derrubalas, entendendo que exista ou non unha discapacidade, non é o que máis importa na vida, porque "non estás limitado polas discapacidades que teñas, senón que estás capacitado polas túas habilidades".

pp/am

Te puede interesar
Comentarios