Un grupo de pontevedreses defensores dos animais entregaron no rexistro xeral da Xunta a acta fundacional para a inscrición da asociación 'Parque digno para cans', que reclama o dereito dos animais a gozar dos espazos públicos.
O voceiro do colectivo cidadán, David Rivadulla, explicou que coa formalización do colectivo esperan que poidan conseguir unha maior atención por parte do goberno local de Pontevedra, e dispós dunha mesa local no Concello "onde se traten estes asuntos".
Rivadulla sinalou que a pesar de ter varios contactos e ata encontros co concelleiro de Sanidade Animal de Pontevedra, Miguel Filgueira (BNG) non se chegou a "ningún acordo" e que tras as negociacións o pasado mes non se avanzou en ningunha dirección.
Por iso avanzou que continuarán as protestas e as manifestacións na cidade do Lérez ata que habiliten un espazo para as súas mascotas, xa que se trata dunha cidade cun elevado censo de animais, "dos maiores de Galicia" e en cambio carecen deste servizo que se ofrece outros concellos, criticou.
O representante da organización tamén apuntou que agardan que coa inscrición se sumen novos integrantes á plataforma, que xa conta con 900 persoas "totalmente implicadas na causa", e ampliar tamén así o ámbito de actuación do colectivo a outras cidades coa mesma problemática.
