O presidente do comité de empresa na planta da Coruña, Nazario Arias, afirmou que o próximo 12 de decembro convocarase unha manifestación
O comité de empresa da planta de Alcoa na Coruña convocou unha folga de 24 horas e unha manifestación, que terá lugar o próximo 12 de decembro entre A Palloza e a Praza de Ourense, tras o anuncio de despedimento colectivo nesta factoría e na de Avilés.
Así anunciouno, en rolda de prensa, o presidente do comité de empresa de Alcoa na planta da Coruña, Nazario Arias, tras manter unha reunión co voceiro do Grupo Municipal do BNG no Concello da Coruña, Xosé Manuel Carril, quen mostrou o seu "apoio" aos traballadores.
Arias, acompañado por membros do comité, reclamou unha nova regulación da enerxía para dar "estabilidade" ao centro situado na Coruña, así como a eliminación do expediente de regulación de emprego anunciado para a factoría.
O equipo, segundo comentou o presidente do comité, intenta "saír deste ano" cunha segunda poxa eléctrica que garanta a "viabilidade" desta factoría para, despois, "durante 2015 tratar de cambiar o marco de regulación do sector enerxético e funcionar cun marco de estabilidade".
"Desinformación total"
"Anúnciannos a morte porque ao final o marco de regulación queda obsoleto, non vale. Arranca cun déficit de oferta. Hai doce bloques de demanda e nove de oferta, co que deixa tres fábricas fóra. Se non o corrixen na segunda poxa e se mantén esa situación, imaxínome que en cinco anos a industria grande consumidora de enerxía eléctrica está desmantelada", advertiu Arias.
Ademais, o presidente do comité de Alcoa na Coruña denunciou a "desinformación total" sobre a segunda poxa eléctrica e sobre o expediente de despedimento colectivo. Precisamente, segundo comentou, este xoves constitúese en Madrid a mesa de negociación sobre o expediente de despedimento colectivo.
