A debilidade dos mercados do norte da África, especialmente o alxerino e o exipcio, ademais do turco, podería afectar ás previsións de produción da factoría de Vigo.
A planta viguesa, a de maior volume do grupo PSA Peugeot Citroën, pechou o ano pasado cunha produción de 406.000 vehículos, unha cifra á que se quere aproximar este ano.
Fontes da factoría consultadas na presentación en Vigo da versión eléctrica da furgoneta lixeira Berlingo, explicaron que a debilidade destes mercados, atribuída polos analistas aos acontecementos da chamada "primavera árabe", xerou unha baixada das vendas dos modelos Peugeot 301 e C-Elysée, fabricados na planta galega, aínda que previamente estes dous modelos estaban por riba dos obxectivos.
A perda neste mercado podería ser compensada polo forte crecemento das vendas do modelo Berlingo e o seu equivalente Partner en Peugeot, modelos que pecharon en 2013 con 99.000 unidades producidas, mentres os monovolumes C4 Picasso e Grand C4 Picasso mantéñense estables coa previsión.
O Citroën Berlingo Electric prodúcese na planta viguesa para todo o mundo e grazas a un acordo asinado coa Xunta de Galicia, todos o Berlingo Electric incorporan a marca "Galicia" na carrozaría.
A chegada do Berlingo Electric á fábrica galega obrigou á implantación dun novo taller de ensamblado de baterías de 850 metros cadrados, con áreas de montaxe, control de calidade e loxística.
Tamén foi necesario un taller de preparación de órganos mecánicos, en que se traballa sobre o motor, os eixes, as baterías e outros elementos específicos, que está situado na área de montaxe e está comunicado coa liña principal.
Nos demais talleres da planta, as particularidades na produción deste vehículo integráronse no fluxo de fabricación principal.
O Citroën Berlingo Electric ensámblase na liña 1, do mesmo xeito que os Berlingo propulsados con motor térmico.