A vítima de 16 anos, foi auxiliada por tres mozos que estaban na zona e que retiveron ao presunto agresor
Un home de 35 anos foi detido despois de presuntamente cometer unha agresión sexual a unha menor de 16 anos durante a noite de fin de ano na cidade de Lugo.
Segundo informaron fontes da Policía Nacional, a agresión sucedeu preto do cinco da mañá, cando unha menor volvía de celebrar a primeira noite do ano cos seus amigos e camiñaba co presunto agresor por unha das rúas da cidade.
En determinado momento, o home de 35 anos quixo agredila sexualmente na rúa e ela empezou berrar. Tres mozos que tamén se atopaban pola zona escoitaron á nova e acudiron na súa axuda.
Cando chegaron, o detido saíu correndo e os tres novos perseguírono até alcanzalo e retelo. Despois chamaron aos servizos do 112, quenes trasladaron o ocorrido á Policía Nacional para intervir.
Ademais, á vez que realizaban a chamada unha patrulla da Garda Civil pasou pola rúa na que se atopaban e apeáronse para saber que sucedía.
Os axentes da Garda Civil permaneceron alí ata que chegou a Policía Nacional e detivo ao acusado de agredir á nova. Por outra banda, a menor foi trasladada en ambulancia até o Hospital Universitario Lucus Augusti (HULA) para someterse a unha serie de análises e probas de protocolo que se realizan neste tipo de casos.
Tras pasar por todo iso, a moza foise a casa e pola tarde acudiu con súa nai á comisaría da Policía Nacional para presentar unha denuncia. Agora, o home permanece nos calabozos da cidade e espérase que ao longo da mañá deste xoves pase a disposición xudicial.
As mesmas fontes da Policía Nacional destacaron o xesto do tres novos que auxiliaron á menor e que retiveron ao presunto agresor. "A colaboración cidadá sempre é o mellor que se pode facer" e este foi un "moi bo" exemplo.