A Fundación Granell promoverá neste verán a exhibición dos seus fondos en diversas sedes de Santiago de Compostela con motivo do centenario do nacemento do artista, falecido en 2001.
A directora da Fundación, Natalia Fernández Segarra, filla do mestre do surrealismo, explicou nunha conferencia de prensa os pormenores desta programación, en que se plasma a importancia desta cidade na vida do pintor, a pesar de nacer na Coruña.
Así, durante os meses de xuño, xullo e agosto, celebraranse actos e exposicións en institucións como a Fundación Cidade da Cultura de Galicia, Museo do Pobo Galego, Fundación Caixa Galicia, a propia Fundación Granell, Auditorio de Galicia e Centro Galego de Arte Contemporánea.
Fernández Segarra sinalou que as dificultades económicas dese momento levaron a restrinxir as pretensións iniciais nalgún caso ou reducir outras previstas, como o caso da exposición sobre alquimia, un asunto polo que o pintor tiña grande interese.
As diferentes propostas expositivas farán referencia a algunhas das moitas facetas do creador galego e versarán, entre outras, sobre a poética de Granell, a súa colección étnica, as obras de Granell noutras coleccións, os novos surrealistas ou Granell e o cinema.
A única exposición que non procede da Fundación compostelá será a que se ofreza na da Caixa Galicia, onde se exhibirán pezas de coleccións particulares e fondos doutros museos, fundacións e caixas doutros puntos de España.
Con motivo desta efeméride, a Fundación Granell editará un catálogo en que escribirán sobre o pintor persoas que nunca o fixeron, así como amigos e coñecidos, que recollerán recordos e vivencias persoais vinculadas ao autor.
Aínda que os organizadores previran realizar 'algo fóra de Santiago', Natalia Fernández sinalou que as dificultades económicas obrigan a non pechar esta opción, aínda que lembrou as actividades da entidade fóra da capital galega e citou, a modo de exemplo, a presentación no vindeiro luns do libro 'Arte y artistas en Guatemala', editado naquel país, do que foi expulsado e onde foi queimada toda a edición menos un exemplar, que agora ve a luz de novo.
