O Concello de Lugo puxo en marcha a segunda edición do programa de inserción laboral 'Lugo Emprego Activo 2', co que 420 parados do municipio poderán formarse durante un período de 36 meses para volver ao mercado de traballo e recibir durante ese tempo entre 350 e 400 euros ao mes.
O programa foi presentado esta mañá nunha rolda de prensa polas concelleiras de Economía e Educación, Sonia Méndez e Esther Muñoz, respectivamente, que informaron de que esta segunda edición do programa 'Lugo Emprego Activo' conta cun orzamento de 1.335.010 euros, un cantidade que financia ao 80% o Fondo Social Europeo.
A programación para o primeiro semestre do ano inclúe, ademais de actividades de carácter transversal, sete itinerarios de inserción: monitor de turismo -300 horas-, atención sociosanitaria a persoas dependentes -450 horas-, elaborador de queixos -445 horas-, técnico en transporte sanitario -385 horas-, instalación e mantemento de xardíns e zonas verdes -470 horas- e enquisador.
Os alumnos admitidos percibirán unha prestación económica de 1,40 euros por cada hora teórica de formación e 3,95 euros por cada unha de prácticas.
Méndez lembrou que foi a 'boa xestión' que realizou o Concello do primeiro programa, xa que un 20% dos 390 parados que participaron nos cursos encontraron un emprego, o que lle permitiu conseguir o financiamento europeo para esta segunda edición do Lugo 'Emprego Activo'.
