O centro cultural de Novacaixagalicia en Vigo acollerá a partir de mañá unha exposición homenaxe a Valentín Paz-Andrade baixo o título 'Galiza como tarefa', con documentos orixinais, fotografías da época, mapas, debuxos, maquetas, obras de arte e documentos audiovisuais, informou unha nota da entidade.
Comisariada por Xosé Díaz, a exposición pretende ofrecer unha visión ampla deste polifacético galeguista, que exerceu de poeta, ensaísta, activista político e empresario, ademais doutras dedicacións.
O material recompilado e ordenado na súa maior parte cronoloxicamente percorre a biografía, a creación, o compromiso e o esforzo de Paz-Andrade por reivindicar Galicia como nación cultural e económica, e por dotala dos medios e instrumentos necesarios para superar un atraso de séculos.
A exposición acompáñase dun catálogo no que destacados escritores, políticos e intelectuais analizan a traxectoria vital do homenaxeado, ao que este ano se lle dedica o Día das Letras Galegas, o vindeiro xoves.
Así, aparecen nos mesmos textos de Isaac Díaz Pardo, Xosé Neira Vilas, Ramón Villares, Víctor Freixanes, Jordi Pujol, Xosé Manuel Beiras, Manuel Rivas, Miguel Anxo Seixas Seoane, Uxío Labarta, Xoán Carmona, Alfonso Álvarez Gándara e do propio comisario.
