Case 1.200 quilos de carne dos animais do parque rural de Aldea Nova, en Sedes, pasaron hoxe ao fondo de alimentos do Centro de Recursos Solidarios (CRS) de Narón do que se nutren unhas 1.400 familias en apuros económicos da zona.
A doazón, que realiza o Concello de Narón, fíxoa oficial hoxe o concelleiro de Medio Natural, Manuel Ramos, e é a suma de 1.093 quilos de carne de porco celta (15 exemplares) e 101 quilos de carne de año (11).
No parque rural de Aldea Nova, na parroquia de Sedes, vive unha parella animal de cada especie que son alimentados con pensos naturais e ecolóxicos.
A matanza e o despezamento, indicou Ramon, realizouno de forma gratuíta unha empresa local, Distribucións Cárnicas Sanesteban. Ao parque, que conta con horto e albergue, acoden familias e colexios da zona que poñen en práctica actividades como cocer o seu pan ou extraer mel dos panais.
O CRS está xestionado por Cáritas e Dignidad. Ata o domingo, a Sociedade Cultural Areosa recollerá no local social de Piñeiros, unha parroquia naronesa, doazóns de alimentos non perecedoiros e produtos de hixiene persoal dentro da súa Semana Solidaria para entregarllas ao Centro de Recursos, do mesmo xeito que Impronta, que promove a recollida de material escolar para entregárllelo a familias sen posibilidades o curso próximo.
