O presidente do Novagalicia Banco, José María Castellano, adiantou hoxe que a entidade contempla reunir a colección pictórica da Caixa Galicia e a Caixanova, uns 8.000 cadros, 'concentrada nunhas mans' mais para contribuír ao mantemento futuro da súa obra social.
Así o detallou Castellano nunha rolda de prensa, en que indicou que nesta iniciativa a entidade colaborará coa Cidade da Cultura 'sen dúbida ningunha', pois trátase de beneficiar Galicia con exposicións públicas dunha colección, eminentemente de pintores galegos, que non ten sentido ter 'escondida'.
'Somos os xestores do banco, mais o banco vén das caixas', dixo o presidente en referencia á Caixa Galicia e á Caixanova, fusionadas na Novacaixagalicia antes do proceso de bancarización, e coa que no xoves pasado se acordou a coordinación de políticas para 'ir da man' neste sentido.
'Estamos no mesmo barco aínda que sexamos dous barcos que se están separando', explicou Castellano, que lembrou que os clientes continúan aludindo ás caixas en vez de ao banco, polo que traballan nunha solución para que a actividade social da caixa teña viabilidade no futuro.
Para iso, continuou, o plan de negocio estabelece, tal e como acordaron o Banco de España, o FROB, a Xunta, a caixa e o banco, que aquela por un lado conta co diñeiro que lle deixou este para desenvolver a súa actividade catro anos (96 millóns de euros), que vai investir en maior participación do banco até chegar a 15%.
Se o atinxir, os dividendos poderían ser suficientes para atender a obra social, sostivo Castellano, polo que a operación consiste en comprar a prezo de mercado activos á caixa para traspasar ese diñeiro á esa finalidade, con vista á data de 15 de decembro.
Este acordo é 'bo para todos', considerou o presidente do Novagalicia Banco, quen lembrou que cada caixa contaba cunha colección, unha ficou na Caixa Galicia e a outra na obra social da Caixanova.
A primeira, como todos os activos e pasivos, pasou ao banco, e a segunda ficou na Fundación, e entre ambas suman 8.000 cadros, 3.500 están en poder do banco e 5.500 na caixa, asegurou.
Agora un equipo de peritos independentes e taxadores están valorando as obras para que o total de cadros pasen ao banco, do mesmo xeito que os bens inmóbeis, que os comparará o banco e que os alugará á caixa para que, a prezo de mercado, realice a obra social, concluíu Castellano.
