Os exames de acceso celébranse esta fin de semana e o próximo 15 de xullo no recinto feiral da Semana Verde de Silleda
| Unhas 14.000 persoas participan esta fin de semana e o próximo venres 15 de xullo nos exames de acceso á Xunta que se celebran no recinto feiral da Semana Verde de Silleda (Pontevedra) e que vixía un operativo formado por 300 persoas. As probas iniciáronse o venres e continuaron na mañá deste sábado cun exame para o que estaban admitidas 4.000 persoas, segundo explicou o director xeral de Función Pública, José María Barreiro. Dentro do dispositivo de case 300 persoas sinalado figuran máis dun centenar de traballadores funcionarios da Administración galega que se encargan do control de acceso ao pavillón no que se realiza o exame. O recinto feiral dispón tamén estes días dunha ambulancia, habilitada pola Administración galega para atender calquera incidencia que se puidese producir durante a realización das probas. Ademais, catro mulleres embarazadas que participan nas probas realizarán o seu correspondente exame nun centro hospitalario, coas mesmas garantías de seguridade que o resto de persoas que participan nestas oposicións. CASE 14.000 OPOSITORES Esta convocatoria de procesos selectivos aos corpos xerais da Administración conta cun total de 13.862 persoas admitidas, das que máis da metade (7.639) aspiran ao corpo auxiliar subgrupo C2. A data do exame é, neste caso, o próximo venres 15 de xullo pola tarde. As 89 prazas que se ofertan son de acceso libre, abertas á participación de calquera cidadán que queira traballar na Xunta e que reúna os requisitos esixidos. Para a proba celebrada o xoves pola tarde, correspondente ao corpo superior A1 foron admitidos 861 aspirantes. Este sábado, pola mañá, desenvolveuse o primeiro exame para o corpo administrativo subgrupo C1, con 4.182 persoas admitidas. Pola tarde foi a quenda dos aspirantes ao corpo de xestión subgrupo A2, neste caso con 1.180 admitidos. |
