A Deputación de Lugo, coa colaboración dunha compañía de teatro, unha asociación de veciños e unha granxa ecolóxica, revivirá o ambiente dunha aldea luguesa entre os anos 40 e 50 para reivindicar as posibilidades económicas dos núcleos rurais como forma de combater o proceso de despoboamento que afecta a esta provincia desde hai décadas.
Esta iniciativa, que se denomina 'Son d'aldea', desenvolverase no vindeiro 3 de setembro na aldea lucense de Albá, en Palas de Rei, grazas á colaboración da granxa familiar Ecoagroturismo Arqueixal, da asociación de veciños 'O Parzamique' e do grupo 'Metátese Teatro'.
A deputada provincial Pilar García Porto, que foi a encargada de presentar hoxe esta iniciativa, explicou que 'Son d'aldea' está ambientada nas décadas dos 40 e os 50, anos en que 'as aldeas centraban toda a actividade de Galicia, até que o proceso de industrialización promoveu o crecemento das vilas e a marxinación do rural'.
'Para revivir esa época de esplendor', matizou, esta actividade inclúe 'unha ruta teatral', que se desenvolverá en seis escenarios diferentes da aldea: o monte, para mostrar os labores do campo; o forno, para recrear o proceso de elaboración do pan; o lavadoiro, polo significado da auga; a escola, para resaltar a relación entre profesor e alumno; ou a lareira, para reproducir as longas conversacións ao carón do lume.
'Metátese Teatro', un grupo cunha longa traxectoria na escenografía galega -naceu en 1992-, será o encargado de reproducir como se vivía daquela no medio rural galego e os seus integrantes mostrarán incluso como se traballa no tundal, onde se facían labores de carpintaría ou se grabuñaba a gadaña.
Esta actividade tamén inclúe unha mostra de oficios tradicionais a cargo de artesáns que aínda continúan traballando e vivindo nas aldeas.
Así, haberá un ferreiro e unha cesteira de Palas de Rei, un canteiro de Antas de Ulla, unha oleira de Outeiro de Rei, un carpinteiro de Becerreá e unha tecedeira de Arbor (A Coruña).
Haberá, ademais, unha mostra de artesanía alimentaria, con expositores de viño da Ribeira Sacra, produtos lácteos, pan, galletas ecolóxicas ou herboristaría, entre outros; uns produtos que tamén comporán o menú do 'Xantar na Aldea', que comezará ás 14.30 horas, e será amenizado pola música de 'Buxaina', 'María Castaña' e 'A Quenlla'.
As entradas para asistir a esta actividade son limitadas e custan 20 euros, porque só hai catrocentas prazas, de maneira que os asistentes se organizarán en oito grupos de 50 persoas para ver as representacións teatrais e as mostras de oficios tradicionais.
