O artefacto caseiro que estoupou nesta madrugada en Ribadumia e causou escasos danos materiais é o segundo que colocan en sedes do PP de Galicia, despois do do concello limítrofe de Meis, en tan só un mes.
No pasado 7 de maio, unha ola a presión con material explosivo no seu interior foi achada ás portas do local do PP de Meis, na rúa Médico Paz Andrade, sen que chegase a estoupar xa que o artefacto puido ser desactivado.
Nesta madrugada, sobre as 4.00 horas, produciuse a deflagración dun artefacto caseiro de pequenas dimensións na sede dos populares en Ribadumia, composto por un cartucho de pólvora unido a tres aerosois, informaron fontes da investigación.
A explosión provocou a rotura do cristal dunha xanela, aínda que non causou ningún estrago no interior da sede do PP, nin sequera nun ordenador próximo.
A onda expansiva si que ocasionou estragos nunha persiana e na impresora.
Os restos do artefacto foron analizados polos Tedax, que se desprazaron ao lugar e estiveron recollendo mostras para a súa análise en laboratorio.
Tamén se presentaron o subdelegado do Goberno en Pontevedra, Antonio Coello, e a alcaldesa de Ribadumia, Salomé Peña.
O presidente do PP local, Martín Serantes, declarou á EFE que 'o relevante', máis alá do tamaño do artefacto ou os danos materiais causados, é 'o feito en si' de colocar un explosivo na sede dun partido político.
Serantes sinalou que esta é a primeira vez que ocorre un suceso destas características en Ribadumia, e que, a falta do que determine a investigación policial, relacionou co de Meis hai exactamente un mes.
Atribuíu esta acción a 'algún desequilibrado ou un grupo de tolos', e advertiu de que 'algún día' poden provocar 'unha desgraza'.
Un dos veciños do edificio en que se rexistrou a deflagración, Javier Oubiña, declarou á Efe que a Garda Civil obrigou os residentes a abandonar os seus pisos durante varias horas, para que os efectivos se encargasen das tarefas de investigación no interior do inmóbel e non se destruísen posíbeis probas.
Dous dos aerosois que non estouparon saíron despedidos despois do estoupido do primeiro para o outro lado da rúa, e foron recuperados polas forzas de seguridade.
