"Non teño ningún reproche que lles facer. Ao contrario, felicitalos", apostilou.
O Fiscal Superior de Galicia, Fernando Suanzes, defendeu a Fiscalía da área de Santiago e o fiscal encargado do caso Alvia, xa que cre que están a levar o asunto "moi ben". "Non teño ningún reproche que lles facer. Ao contrario, felicitalos", apostilou.
Suanzes negou que dende o Ministerio Público se"estea a defender" os cargos de Adif no procedemento aberto polo accidente do tren Alvia, que supuxo 80 mortes e máis dun centenar de feridos o 24 de xullo de 2013 no barrio compostelano de Angrois.
"A fiscalía mantén unha determinada posición dende a legalidade e a imparcialidade. As vítimas son unha das nosas prioridades. Nós non defendemos os cargos de Adif, defendemos a legalidade e a imparcialidade", manifestou Suanzes.
Preguntado sobre se a reapertura do caso ordenada pola Audiencia Nacional supuxo unha "desautorización" cara á Fiscalía, Suanzes respondeu que "entende que non desautorizou" senón que a Audiencia indicou que "é necesario continuar a investigación practicando novas dilixencias".
"Conforme a iso, o Ministerio Fiscal poderá pedir outras, facer unhas distintas, escritos de acusación distintos, parecidos, semellantes ou non modificar nada", engadiu. "Nós non defendemos a ninguén. Defendemos os cidadáns con arranxo ao principio de legalidade e imparcialidade que, ás veces, coincide coas vítimas e outras non", insistiu.
"O cidadán ten que entender que as regras do procedemento xudicial permiten que as partes teñan diferentes valoracións", continuou, para logo resaltar que "o procedemento penal é dinámico, non estático", polo que "ás veces" pode darse que a Fiscalía manteña "unha determinada posición" e "ao chegar ao xuízo" segundo as "probas" que fosen presentadas pode "dende retirar a acusación, a modificala ou aumentala".
"GARANTÍAS" DO PROCEDEMENTO PENAL ESPAÑOL
"O procedemento penal español é un dos que maiores garantías ten do mundo, en medida en que permite comparecer a un montón de xente," manifestou.
Suanzes tamén foi cuestionado sobre se a Fiscalía segue crendo que o maquinista do tren Alvia accidentado foi o "único" responsable do sinistro. En relación a isto, indicou que esta cuestión require "matizacións e precisiones".
"A Fiscalía de Santiago e o fiscal que leva o asunto son extraordinariamente competentes nesta materia. Cos elementos que tiveron no seu momento fixeron unha cualificación dende o punto de vista do Ministerio Fiscal absolutamente boa, notable, sobresaínte,", remarcou. "Outra cousa é que se modifique cos novos elementos, dilixencias ou calquera outra incidencia", finalizou Suanzes.
