A Audiencia Provincial da Coruña condenou a principios deste ano ao exelectricista da Catedral de Santiago José Manuel Fernández Castiñeiras a 10 anos de prisión
A Sala II do Tribunal Supremo reduciu a 9 anos de cárcere a pena imposta ao ladrón do Códice Calixtino por un delito continuado de roubo con forza nas cousas e outro de branqueo de capitais, unha condena que a Audiencia Provincial fixara orixinalmente en 10 anos.
Segundo a sentenza dada a coñecer este xoves, a Sala rexeita todos os motivos do recurso do acusado polas "abafadoras probas de cargo" existentes contra el, aínda que reduce nun ano a condena imposta ao ter en conta que, polas regras da continuidade delituosa, era "máis beneficioso" para el considerar que a subtracción do Códice foi un roubo e non un furto, ao contrario do que se fixo en primeira instancia.
A Audiencia Provincial da Coruña condenou a principios deste ano ao exelectricista da Catedral de Santiago José Manuel Fernández Castiñeiras a 10 anos de prisión por furto, roubo continuado e branqueo de capitais pola subtracción do Códice Calixtino e outros efectos.
Na sentenza, emitida o 18 de febreiro, a Audiencia considerou probado que Fernández Castiñeiras, que foi electricista da basílica compostelana durante 25 anos, cometeu un delito de furto pola subtracción do manuscrito, un delito continuado de roubo con forza nas cousas pola subtracción de diversas cantidades de diñeiro e documentación da Catedral e un delito de branqueo de capitais pola compra de inmobles con diñeiro de procedencia ilícita.
Por iso, foi condenado como autor responsable dun delito de furto a tres anos de prisión, a cinco anos por un delito continuado de roubo con forza nas cousas e a dous por un delito de branqueo de capitais, así como ao pagamento dunha multa de 268.425,11 euros, con responsabilidade persoal subsidiaria en caso de non pagamento de seis meses. O Tribunal Supremo reduciu agora esta condena nun ano.
FEITOS PROBADOS
Durante as 11 xornadas que durou o xuízo, entre o 19 de xaneiro e o 5 de febreiro deste ano, o tribunal considerou probado que Fernández Castiñeiras subtraeu o Códice Calixtino da cámara na que se atopaba no Arquivo da Catedral de Santiago nos primeiros días de xullo de 2011. O manuscrito foi localizado nun garaxe da súa propiedade en O Milladoiro un ano despois, en xullo de 2012.
De forma paralela, a sentenza condenou tamén ao exelectricista por roubo continuado, tras considerar probado que ao longo de varios anos fixera uso das chaves das que dispoñía e da confianza depositada polo persoal da Catedral para subtraer, polo menos, "2.447.560 euros, así como diñeiro noutras divisas.
