Un home que forma parte dun grupo de oito que percorreu en bicicleta 200 quilómetros dende Campo de Criptana (Ciudad Real) ata a capital galega converteuse hoxe no peregrino número 100.000 deste ano
Julián Rubio, ademáis de recibir a "Compostela", o título expedido pola Igrexa que acredita ter percorrido polo menos douscentos quilómetros en bicicleta ou a cabalo, ou ben máis dun centenar a pé, recolleu varios agasallos, entre eles unha versión sinxela do denominado Códice Calixtino.
"Máis que darme unha sorpresa, o que fixeron é asustarme", confesou entre risas Rubio, quen contou que, ao ver a actitude das persoas da Oficina do Peregrino, encargada de expedir eses documentos sobre a base dunha serie de selos acreditativos, creu que había algún problema que lles impedía obter a "Compostela".
Indicou, así mesmo, que é a terceira ocasión na que percorre o Camiño de Santiago e afirmou ante un grupo de xornalistas que a súa intención é repetir ese periplo en 2021, coincidindo co próximo Ano Santo.
Emocionado tras recibir o documento cunha mención especial, manifestou que o feito de ser o peregrino 100.000 "non ten ningunha importancia", xa que "detrás de min virá moita outra xente".
"O importante é facer o camiño e (poder) rematar todos", dixo en alusión ao equipo que o acompañaba e que efectuou ese percorrido en nove días.
Confesou Julián Rubio que é "moi torpe" en bicicleta, desvelou, como proba diso, que caeu "dúas veces" durante o traxecto e animou as autoridades a "coidar un pouco" e "sinalizar" determinados sendeiros como a Ruta da Prata ou o Camiño de Levante.
O Camiño de Santiago recibiu o ano pasado 237.810 peregrinos de 150 nacionalidades; preto da metade, o 47,75%, procedían de diferentes puntos de España e o resto doutros países, con 20.214 italianos na cabeza, 16.331 alemáns, 11.635 portugueses, 11.576 estadounidenses e 9.343 franceses.
Nos últimos dous anos, a Igrexa atribuíu o título de peregrino 100.000, que recaeu o 17 xullo de 2014 nunha muller de máis de douscentos integrantes do grupo de colexios "Pureza de María" e o 23 xullo de 2013 a un home que viaxou coa súa familia dende Extremadura.
