Coñecer as nosas orixes, a unión co país veciño e a vida de antes na comarca foi o que descubriron, nunha xornada atípica, os alumnos do instituto Castro de Baronceli de Verín, os que desfrutaron dun día “raiano”, no que os mozos se achegaron á Raia e a súa historia.
A primeira das actividades foi o visionado do documental “A memoria da Raia”, das mozas Iris Justo, Miriam Francisco e Andrea Pérez. Elas amosaron, nun coloquio cos alumnos, as relacións transfronteirizas que existían -e aínda se conservan- entre galegos e portugueses, moi especialmente nos municipios raianos de Monterrei.
A viaxe finalizou cun paseo “para poñernos na pel dun contrabandista -explican dende o centro- e camiñar, desfrutando dunha espléndida paisaxe” por Vilardevós e a súa ruta do contrabando, pisando terra portuguesa en Segirei. Unha xornada académica diferente na que os participantes se achegaron á vida pasada da Raia, onde a fronteira só era unha liña de división destos municipios irmáns.
