"Ata Laza chegan moitos peregrinos, hai un gran intercambio cultural"

A lazana Carmen Rivero presenta este sábado un novo poemario: “Entre a terra e as estrelas”. A cita será no salón de actos do Concello ás 20,00 horas. A escritora estará acompañada de José Ramón Barreal, alcalde de Laza; José Antonio Quintas, vicepresidente da asociación cultural Amigos Vía da Prata, e Antonio Rodríguez Colmenero, escritor, catedrático e historiador. Que se atopará o lector en “Entre a terra e as estrelas”? Este poemario fala da Vía da Prata ou Camiño Mozárabe dende Laza ata Santiago de Compostela. A través dunha peregrina vai amosando a historia, a paisaxe e as lendas dos lugares polos que pasa. Neste percorrido amósanos o dano que o ser humano lle fai ó noso planeta nun intento desesperado de poñerlle freo ó cambio climático para tentar reverter esta situación. Que é o mencionado Lombo da Forca do libro? É un monte dende o que se divisa Laza; ademais, a súa beira pasa o Camiño Mozárabe, que descende cara ó val. Cal é a importancia da unión entre Laza e Compostela a través do Camiño? É enorme, constituíndo un fenómeno social complexo. Aquí enlaza o Camiño Mozárabe co Camiño Portugués, que entra no concello por Arcucelos, para continuar xuntos ata Santiago. O número de peregrinos aumentou despois da pandemia. Achéganse ata aquí cada día moitos peregrinos dende lugares ben afastados, hai un gran intercambio cultural. Ten, polo tanto, esta ruta xacobea un gran valor paisaxístico e cultural onde o peregrino se pode integrar totalmente co territorio. Que é para vostede Laza? Como sempre digo, Laza para min é o meu mundo, no que están as miñas raíces e no que son moi feliz. Dende a súa paisaxe, ós seus costumes, ás súas festas e tradicións ata a súa xente. Todo me engaiola cada día, por iso escribo sobre ela. Que puntos fortes ten Laza? Laza é mundialmente coñecida polo seu Entroido, do cal estamos moi orgullosos. Ten ademais outras festas importantes como son a Festa do Santo Cristo ou Festa da Eva, o San Xoán etc. Porén a súa paisaxe é tamén impresionante constituíndo o pano de fondo excepcional para conservar estas festas e tradicións. “Entre a terra e as estrelas” non é o seu primeiro poemario… Exacto. O meu primeiro poemario, “Berce de peliqueiros”, foi escrito dende Laza para todo o mundo cunha temática social variada e de denuncia: contra a violencia de xénero, os lumes, a emigración, Galicia, a lingua galega, o cancro… No segundo, “Nun recuncho chamado Laza”, os seus versos falan dos costumes e tradicións da xente de Laza e tamén das súas festas, así como de personaxes importantes. E por que a poesía? Porque me gustan as palabras e a súa sonoridade. A través da poesía podo expresar mellor as miñas ideas e sentimentos. Ademais, penso que o poder da poesía é inmenso neste mundo interconectado. Ten un poder máxico, humano e universal para vincular persoas de diferentes lugares do planeta, porque a poesía é, sobre todo, sentimento e paixón. Cal será o seu próximo libro? O proxecto máis próximo é unha serie de contos que xa comecei, pero non me esquezo da poesía, que está presente na miña vida. E si, tamén haberá máis poemarios.