As casas do maior de Monterrei -localizadas en Albarellos- xa están funcionando a pleno rendemento. Fernando González, director xeral de Maiores e Persoas con Discapacidade, visitou os dous centros de atención diúrna, onde aplaudiu o servizo de conciliación que prestan aos seus veciños. José Luis Suárez, alcalde de Monterrei, acompañou o representante da Xunta no percorrido polas novas instalacións .
A Xunta de Galicia destinou 75.000 euros para a posta en marcha da “Casa do Maior Monterrei” e a “Casa do Maior Afouteza”, as que xa teñen usuariis desfrutando dos seus servizos. Para facelos máis completos, unha das casas funciona con horario de mañá e a outra traballa ás tarde.
Novos centros
Durante o acto, González remarcou que a creación de “83 casas do maior repartidas por toda a Comunidade permite ofrecer recursos de conciliación e atención naqueles concellos máis pequenos do rural". Por iso, o Goberno galego axuda no equipamento e mantemento anual destas instalacións a través dunha achega de 15.000 euros pra a adecuación de cada centro e outros 25.000 euros anuais para o seu funcionamento diario.
O director xeral adiantou en Albarellos que a Xunta seguirá incrementando a extensión desta rede autonómica de casas do maior para atender a todos os concellos que carecen deste tipo de recursos. Nas vindeiras semanas darase a coñecer a resolución dunha nova convocatoria de axudas, que permitirá a apertura de 30 novos centros.
