O Centro de Información á Muller (CIM) da Mancomunidade de Monterrei vén de presentar o seu proxecto “Tempo para autocoidados” con actividades deportivas gratuítas para cativos e maiores. Un proxecto que, ano tras ano, realizan co obxectivo de fomentar o autocoidado entre os veciños da comarca.
Este ano, as actividades deportivas desenvolveranse durante o mes de maio e contará con catro talleres. Os cativos poderán somerxerse no ballet infantil, comezando as clases o 15 de maio ás 17,30 horas na sala Todo Fitness de Verín. Os máis pequenos da casa tamén poderán anotarse en baile urbano, que comezará tamén o día 15 ás 18,15 horas na mesma sala deportiva.
Para as mulleres, poderán elixir entre pilates e ximnasia restaurativa. O curso de pilates comezará o 16 de maio ás 12,00 horas no centro deportivo Higia, en Verín, mentres que a ximnasia restaurativa será no mesmo centro e iniciarase o 18 de maio ás 12,00 horas. Todos os talleres deportivos contarán con oito sesións gratuítas.
Inscrición obrigatoria
Os interesados en sumarse a “Tempo para autocoidados” deberán anotarse de forma presencial nas oficinas do CIM, de mércores a venres de 10,00 a 12,00 horas ou vía WhatsApp no teléfono 611 50 76 40.
Este proxecto, subvencionado polos sete concellos da Mancomunidade de Monterrei, realizase en colaboración cos centros deportivos Sala Todo Fitness e Centros Higia para animar ás mulleres e nenos a que traballen corpo e mente mediante actividades deportivas. Neste programa poden participar todas aquelas persoas que o desexen, usuarias ou non do Centro de Información á Muller, dos sete concellos que engloba a Mancomunidade.