O Castelo de Monterrei converterase, un ano máis, no epicentro mundial da gaita debido á celebración da XXXVIII Xuntanza Internacional de Gaiteiros os días 25 e 26 de agosto. Este importante foro de carácter mundial naceu hai case 40 anos como complemento ás actividades da Escola Provincial de Gaitas da Deputación de Ourense.
"A súa primeira edición celebrouse o 26 de xullo de 1986 no barrio da Ponte de Ourense, baixo a denominación de I Xuntanza de Gaiteiros do País. A partir desa edición o evento foi percorrendo distintos concellos da provincia, establecéndose no 2007 o Castelo de Monterrei como sede permanente. No 2016 foi declarado evento de Interese Turístico e Cultural pola Xunta de Galicia", explicaron as autoridades na presentación da cita.
En dita presentación participaron Marta Nóvoa, vicepresidenta primeira da Deputación de Ourense; Gabriel Alén, delegado territorial da Xunta en Ourense; José Luis Suárez, alcalde de Monterrei; Xosé Lois Foxo, director da Escola de Gaitas da Deputación, e Nonito Pereira, fillo dun dos homenaxeados nesta edición. "Cando un evento leva 38 anos, é porque ten éxito", anotou Nóvoa, quen afirmou que é "unha honra colaborar dende a Deputación cun acontecemento tan importante para a música tradicional galega e para toda a comarca de Monterrei desde un símbolo tan fermoso como é o Castelo".
Pola súa banda, Suárez puxo en valor "non só a importancia cultural deste acontecemento, senón tamén o impulso dinamizador que supón para o municipio e para toda a comarca". Unha comarca que homenaxeará esta fin de semana a Nonito Pereira, algo que agradeceu emocionado o seu fillo que leva o seu mesmo nome. Por último, Foxo lembrou que coa 38 edición desta xuntanza "marcamos 38 anos de vida coa gaita como parte fundamental da historia da civilización" e sinalou que a filosofía deste evento "non só é divertimento: é a busca do coñecemento".
Así, a Xuntanza de Gaiteiros constituíuse, ao longo dos anos, como un prestixioso foron a nivel universal, tendo pasado polos seus escenarios os máis destacados gaiteiros de calquera rincón do mundo. O obxectivo é levar a Ourense dende as gaitas máis primitivas ata aquelas máis cultivadas. Precisamente, "grazas a esta inquedanza, a Xuntanza é unha escola aberta, non somentes para estudosos, senón tamén para os amantes da música de gaita", anotaron na presentación.
A cita comezará o venres ás 19,00 horas con actuacións na Praza da Hermida de Flariz. Alí participará un grupo local e agrupacións que chegan dende Bretaña, Georgia, Asturias e Zamora.
O día grande será o sábado, 26 de agosto, onde se desenvolverán conferencias didácticas, exposicións e actividades de carácter científico, sen esquecer a música. Haberá unha mostra fotográfica no Hospital do Peregrino do Castelo sobre a iconografía da gaita e ás 11,00 horas comezará o curso de técnica de Uilleann Pipe, seguido da homenaxe ao produtor musical Nonito Pereira e variadas conferencias. Será ás 19,00 horas cando comezará a soar a música, na explanada do Castelo de Monterrei e coa participación de case unha vintena de formacións.
