A Biblioteca Municipal e o Concello de Verín veñen de crear unha nova sección, baixo o título "Mundo Árabe". É un fondo bibliográfico en lingua árabe e en lingua castelán sobre a cultura, literatura e outros aspectos xerais que profundizan e recoñecen o valor do mundo árabe e o seu desenvolvemento en diferentes manifestacións culturais.
Esta sección foi posible grazas á colaboración e ao interese de Luisa Mora Villarejo, xefa de Servizo da Biblioteca Islámica "Félix María Pareja", dependente da Axencia Española de Cooperación Internacional para o Desenvolvemento, do Ministerio de Asuntos Exteriores e de Cooperación. "Nos últimos tempos a biblioteca viu incrementar o número de usuarios árabes que buscan nas nosas instalacións información, lecturas xerais e de lecer sobre a súa cultura", comentan dende a entidade.
Así, a nova sección está integrada por máis de medio centenar de libros doados pola Biblioteca Islámica, entre os que se atopan dicionarios árabe-castelán, antoloxías poéticas, escritos sobre literatura palestina, Islam e dereitos humanos, entre outros.
Samanta Barreira, concelleira de Cultura, quixo coñecer de primeira man a nova sección da Biblioteca Municipal, "unha sección que é un paso importante para promover o coñecemento e a comprensión da rica cultura árabe entre a cidadanía", dixo. "Agradecemos a colaboración da Biblioteca Islámica "Félix María Pareja" e esperamos que esta iniciativa fomente a interculturalidade e o diálogo entre as nosas comunidades", engadiu Barreira.