Da vinculación dos estudos de Ramón y Cajal co balneario, xurdiu a certificación das augas da buvete de Cabreiroá, que aínda se conserva na súa fonte principal.
O Concello de Verín vén de instalar un novo mural na rúa Canela Cega para contribuír a eliminar o feísmo das rúas do municipio ensalzando figuras ou acontecementos históricos ligados á vila do Val do Támega. Nesta ocasión o protagonista da pintura é o científico Santiago Ramón y Cajal.
Tres anos despois de recibir o Nobel de Medicina por descifrar os segredos das redes neuronais do cerebro, Santiago Ramón y Cajal recolleu nunha carta manuscrita que foi remitida por el mesmo ao director do establecemento termal de Cabreiroá –e que acaba de saír á luz– que o máis importante elemento para a conservación da súa saúde era, nin máis nin menos, que a auga deste manancial verinense, do que fixo uso durante máis dun ano.
Ramón y Cajal foi o patólogo de maior relevancia mundial a finais do século XIX e principios do XX, grazas aos seus estudos sobre a natureza da célula e das neuronas. Da súa vinculación co balneario, xurdiu a certificación das augas da buvete de Cabreiroá, que aínda se conserva na súa fonte principal.