A XXIV Feira do Pemento de Oímbra celebrouse durante toda a fin de semana dun xeito diferente: por todos os bares do concello, once locais hostaleiros que traballaron de cheo para que o coronavirus non frease a celebración máis esperada do ano pola veciñanza de Oímbra, unha modalidade diferente pero que resultou exitosa.
O Concello repartiu pementos por todos os establecementos participantes para que así, os veciños e veciñas do municipio, ademais dos que decidiron achegarse doutros puntos do territorio galego, degustaran de maneira gratuíta o produto estrela na hortas do municipio: o pemento.
Así, as rúas de Oímbra, San Cibrao, Casa dos Montes e os demais núcleos rurais do termo municipal enchéronse de bo ambiente e música, respectando as medidas sanitarias de seguridade. A alcaldesa Ana Villarino agradeceu “a implicación e a responsabilidade dos 11 bares do concello, que fixeron posible que poidéramos festexar, dun xeito diferente, a Feira do Pemento”, concluíndo orgullosa que “entre todos facemos Oímbra”.
