Brais Quintairos: "Saber actuar ante unha emerxencia debería ser obrigatorio no colexio"

Brais Quintairos traballa no Servizo de Urxencias Médicas de Madrid (Summa 112), e volta a súa terra natal para amosar en Verín a importancia de saber actuar nunha emerxencia e as claves para asistir a un enfermo. Este sábado, ás 18,00 horas, o Auditorio acolle “112 desde Cero”, a conferencia deste mozo enfermeiro. Que é “112 desde Cero”? É unha idea que leva na miña cabeza bastante tempo. Un pequeno proxecto piloto que intentará familiarizar aos asistentes con esas situacións nas que pode estar en xogo a vida da persoa que temos diante. Lamentablemente xorde, en parte, pola falta de coñecementos da poboación xeral en materia de sanidade. Saber actuar ante unha emerxencia ou situación de risco vital debería ser contido obrigatorio no colexio no noso país, como xa acontece noutros. Cal será o contido da conferencia? Abordarase todo o básico que debería saber calquera persoa que saia á rúa. Dende como actuar cando se desmaia a señora que temos diante na pescadería ata como axudarlle ao corazón do noso veciño a volver a latir en condicións. Incluíndo, por suposto, a onde chamar! Que ás veces ata se nos esquece o número! Será unha charla amena, entretida e o máis importante... como di o título: dende cero! Para tódolos públicos. Por que en Verín? Levo dende os 18 anos fóra da vila, estudando e formándome no que me gusta. Meus pais e meus amigos xa case só me vían no Entroido, e iso non pode ser! É hora de que a xente vexa que non perdín o tempo e que algo aprendín. Ademáis, un nunca debe esquecerse de onde ven, compartir cos meus veciños o adquirido faime moitísima ilusión. Algo que non sería posible sen a disposición do Concello. Como é o seu día a día en Summa 112? Pois aínda que a alguén lle poida soar un pouco fóra de lugar, a resposta é: moi divertido! Vivo subido nunha ambulancia de Soporte Vital Avanzado xunto con dous técnicos de emerxencias e un médico. Encargámonos, polo xeral, da atención e traslado dos pacientes máis graves. E para isto Madrid é a cidade perfecta; moita xente xunta que non paran de darlles guerra aos servizos de emerxencia. Estou aprendendo moitísimo e encántame o meu traballo. Os pros e contras? Eu penso que unha das vantaxes desta profesión é a variedade de postos nos que podes estar. Unha enfermeira pode traballar diante dun ordenador, xestionando ou investigando, nunha planta de hospitalización, nun Centro de Saúde... Do mesmo xeito, isto convértese nunha das maiores desvantaxes. Á vista dos xestores e altos cargos dos Sistemas de Saúde valemos para todo, calquera sitio; un día aquí e outro alí. Contratos precarios. Anos e anos para acadar un posto fixo. É unha das profesións máis fermosas e, á vez, máis maltratada. Que quere acadar con esta conferencia? Gustaríame que todo o mundo saíse da charla comprendendo a importancia de saber actuar ante unha situación de emerxencia. Que a morte non ten que ser un tema tabú, que existe. Que en calquera momento nos podemos atopar cunha persoa que estea loitando contra ela, e nas nosas mans estará o axudarlle a sobrevivir. Non hai maior satisfación que salvarlle a vida a alguén. E non hai peor sensación que non saber como facelo.