O acto de entrega terá lugar esta fin de semana no Carballiño, dentro do programa do festival, que se celebra do 13 ao 16 de decembro, pechando a programación desta 34ª edición.
Agrupa ós actores e directores teatrais, e traballa pola defensa dos intereses da profesión
A asociación galardoada é unha entidade sen ánimo de lucro creada en 1985 que agrupa ós actores e actrices de Galicia, así como directores teatrais. Representa a máis de 330 actores e traballa pola defensa e reivindicación dos intereses da profesión na orde cultural, social e laboral. O premio outórgase desde o Fetega a este colectivo pola súa traxectoria e o seu fondo e continuado traballo de promoción e formación no sector das artes escénicas galegas, creando a unión necesaria entre os profesionais do sector.
Os premios Fetega son un dos principais valedores do prestixio do Festival do Teatro Galego. Cada ano avalían o compoñente artístico, premian a calidade e promoven a difusión cultural e o atractivo de produto presentado. Denominados desde 2017 “Premios Fetega Dorotea Bárcena”, o festival leva recoñecendo o labor dos artistas profesionais desde o ano 2006. Ademais deste premio de honra á traxectoria, outorgado pola organización, o sábado 16, o público asistente elixirá tamén o mellor espectáculo dos programados este ano, mediante votación directa en furna.
