Beariz delimita dous castros para evitar a súa destrución

A Dirección Xeral de Patrimonio Cultural autorizou ao arqueólogo Celso Hugo Barba Seara para realizar a actividade arqueolóxica denominada “Proxecto de control arqueolóxico dos traballos de roza e limpeza de vexetación, documentación e posta en valor de xacemento arqueolóxico do Castro de Garfián”, en Beariz. A intervención ten como obxecto principal evitar a destrución ou alteración dos restos arqueolóxicos que se atopan dentro do xacemento. O Concello aposta pola posta en valor destes e outros restos, tendo xa catalogados 23 mámoas, 3 castros e 16 petroglifos localizados en distintos lugares do municipio.

Esta iniciativa vense a sumar a que se está desenvolvendo no castro de Magros, tamén impulsada pola Xunta de Galicia, e coa que se persegue o mesmo obxectivo, “limpalos e delimitalos para evitar alteracións con maquinaria e así protexelos con vistas a futuras excavacións”, puntualiza o alcalde de Beariz, Manuel Prado.

O xacemento de Garfián está emprazado sobre un outeiro que ten na súa parte alta o recinto principal, a croa circular con aproximadamente 70 ou 80 metros de diámetro, e que está delimitado por un parapeto que destaca ao exterior cunha altura que oscila entre os 3 metros na zona sur, os 3 ou 4 metros nas zonas norte e leste e uns 5 metros no oeste.

Na zona sur hai 3 rochas próximas entre si nas que se observan un mínimo de 11 cazoletas, así como varias liñas alongadas (posibles serpentiformes), dous rebaixes rectangulares e 3 cruces gravadas.

Os traballos no Castro de Garfíán consistirán na limpeza con medios manuais para delimitar coa maior exactitud a extensión do xacemento. Posteriormente procederase a o levantamento topográfico e, finalmente, levarase a cabo a colocación dun cartel explicativo para facilitar a comprensión do xacemento ao visitante, que incluirá debuxos dos petroglifos situados nas rochas da croa.

O FOSO E MURALLA XA ESTÁN Á VISTA EN MAGROS

Martiño Xosé Vázquez Mato é o arqueólogo que dirixe os traballos no Castro de Magros, onde está a punto de rematar a limpeza dunha superficie de 8.000 metros cadrados. O experto sinala que o desbroce está deixando á vista “moitos metros de murallas”, sinalando que “é un xacemento moi importante”. Tamén se podera observar o foso, xa que se trata dun poblado fortificado, que podería datar de fai .2000 anos, ou tamén podería ser unha fortaleza medieval, segundo indica. Sinala que “estámonos topando cun circuito defensivo e unha vez limpo hai que facer unha prospección para fixar as datas, aínda que parece castrexa e tamén puido ter ocupación posterior”. O Concello de Beariz xa delimitou e procedeu a sinalizar a Mesa dos Bispos e a mámoa de Santo Domingo, estando prevista a de Liñares.