Carballiñeses de recoñecido prestixio no ámbito da investigación e alumnado dos institutos da vila protagonizarán a primeira edición das Xornadas pola Ciencia.
O Concello e os representantes dos centros educativos uniron esforzos para organizar esta iniciativa, que se desenvolverá do 17 ao 21 de abril e que pretende animar aos rapaces a divertirse e aprender sobre esta materia.
O cardiólogo Eduardo Barge; o físico e Premio Nacional de Meteoroloxía, Miguel García Pérez, e a química e investigadora Marga Vázquez serán os poñentes desta iniciativa que rematará cunha feira científica dos estudantes na Praza Maior.
A iniciativa foi presentada polo concelleiro de Cultura, Diego Fernández; as representantes do IES Número 1, Isabel Álvarez e Ana Lousado, e o director do IES Chamoso Lamas, Aurelio Rodríguez.
Almudena Mosquera, directora do IES Nº 1, asegurou que tanto o alumnado como os docentes “están desexando divertirse coa ciencia nunhas xornadas que agardamos que se sigan repetindo no futuro”.