Catro liñas unirán os pobos coa capital municipal, a 1,40 euros por viaxe
O Concello de Vilar de Santos puxo en marcha un proxecto piloto de transporte público mediante o Taxi de Uso Compartido no termo municipal. O obxectivo desta iniciativa é dotar de transporte a aquelas zonas que na actualidade carecen del, intentando resolver as dificultades de acceso ao transporte ás que se enfrontan diariamente os veciños. Desde o concello, que preside Xan Jardón, se considera que é a mellor alternativa posible de transporte para comunicar os distintos lugares, facilitar a mobilidade interna e poder atender e cubrir as necesidades e os desprazamentos da veciñanza, sobre todo de persoas maiores e con problemas de mobilidade, ao Centro de Saúde, ao Concello e demais servizos (banco, farmacia, supermercado,...) situados en Vilar de Santos.
A idea xurdiu no mes de maio, no período de alegacións ao novo Plan de Transporte da Xunta, no queVilar de Santos propoñía o uso do taxi, pola falta de adecuación á nosa realidade e ldado que existían precedentes noutros lugares.
O Taxi Compartido pode ser utilizado por calquera veciño compartindo viaxe con outro veciño nos horarios e liñas preestablecidas nas paradas dos pobos do concello nos días sinalados, os luns e xoves, excepto festivos. O Taxi Compartido opera estruturado en catro liñas con percorridos que unen todos os pobos do concello con Vilar de Santos. Así, a Liña 1, sae ás 8,45 horas desde Laioso, por Bréixome de Arriba, cruce Bréixome de Abaixo, A Venda, Toxediño e Vilar de Santos (Centro de Saúde e Concello) e volta ás 11,30 horas desde a Casa do Concello e Centro de Saúde.
- A Liña 2: sae ás 08,55 horas desde Alto de Outeiro, por Parada, Castelaus polo pobo e Vilar de Santos (Centro de Saúde e Concello) e volta ás 11,45 horas desde a Casa do Concello e Centro de Saúde.
- A Liña 3: sae ás 09,05 horas desde Casas da Veiga, por Barrio e Vilar de Santos (Casa do Concello e Centro de Saúde) e volta ás 12,00 horas desde o Centro de Saúde e Casa do Concello.
- A Liña 4: sae ás 09,15 horas desde O Vieiro, A Ponte, a Pallota, Mosqueiro e Vilar de Santos (Centro Saúde e Casa do Concello) e volta ás 12,15 horas desde a Casa do Concello e Centro de Saúde.
Os usuarios do taxi pagrán unha tarifa plana e única en todo o termo municipal, de 1,40 euros por viaxe e usuario. Este novo servizo estará en probas ata o 1 de febreiro, e daquela faranse os axustes definitivos e adaptar os horarios e os traxectos á demanda real existente.
