Dúas das 12 licencias de taxi existentes en Ribadavia foron anuladas por acordo unánime do pleno da Corporación municipal, que se reuniu onte en sesión ordinaria. A suspensión destas licencias fora proposta ó Concello polo gremio de taxistas da vila, 'xa que os dous vehículos de transporte non funcionaban dende hai dous e seis anos, respectivamente', indicaron. Así, fíxose cumprir a ordenanza municipal, que fixa un máximo de seis meses sen actividade para anular a praza.
Por outra banda, a Corporación tamén aprobou por maioría unha moción de urxencia na que se insta á Xunta a negociar coa Fegamp o mantemento das subvencións de axuda social ós municipios. Tamén foron aprobadas sendas propostas reclamando un contrato homologado para o viño do Ribeiro e para a toma de medidas de prevención nos montes a fin de evitar os incendios.
