A localidade acolle un mercado artesanal, xantar con porco celta e xogos para os máis cativos
Cortegada prepárase para acoller a novena edición da “Feira de Artesanía e Porco Celta” cun completo programa de actividades gastronómicas e culturais que terán lugar o día 19 de agosto. Na presentación do evento participaron o vicepresidente da Deputación de Ourense, Rosendo Fernández; e o alcalde e a concelleira de Servizos Sociais de Cortegada, Avelino Luís de Francisco e Begoña Estévez, respectivamente.
O vicepresidente da Deputación de Ourense dixo que este evento ofrece “un amplo programa de actividades que mestura música, pasarrúas, espectáculos de lume, actividades para os cativos e gastronomía”. O programa da Feira, tal e como detallou Begoña Estévez, comezará o sábado, 18 de agosto, ás 22,30 horas cun espectáculo de lume. Ao día seguinte, a apertura da Feira será ás 11,00 horas e participarán nela 30 artesáns. Durante toda a xornada haberá diferentes actividades como pasarrúas musicais, baile medieval a cargo dos nenos de Cortegada, campamento infantil, e ás 17,30 horas, celebrarase a Festa da Auga, pechando a xornada un espectáculo de lume, ás 22,00 horas. A degustación gastronómica, a base de porco celta, paella e viño do Ribeiro, será a partir das 14.00 horas.
