O PSdeG-PSOE de Leiro vén de rexistrar unha petición formal no Concello para que se proceda con “carácter de urxencia” á limpeza integral da Ponte da Esperela e da Ponte de San Clodio, xa que presentan unha imaxe “deplorable e de abandono”, ao estar cubertas pola maleza.
Os socialistas consideran estas dous infraestruturas claves no municipio, xa que no caso da Esperela, “trátase dunha das portas de entrada a capital do Concello” e a Ponte de San Clodio de orixe medieval, é referente cultural de Leiro e, dende 1981, é Monumento Nacional e Ben de Interese Cultural (BIC). Dende o PSdeG aproveitan tamén para lembrar que no ano 2018 procedeuse á limpeza da mesma, retirando árbores, plantas ou pedras incrustadas, “que puñan en perigo a integridade da ponte”, explica o portavoz Manuel Rodríguez. Desta maneira, insta ao goberno municipal a buscar axudas noutras administracións para a limpeza das dúas pontes.
O alcalde de Leiro, Francisco José Fernández, sin entrar en polémica, manifestou que “tomo nota”.
