O alcalde de Ourense, Agustín Fernández, anunciou que tomará a partir de hoxe un 'papel activo' para esixir o 'inmediato desbloqueo' das obras de ampliación do Complexo Hospitalario Universitario de Ourense (CHUO) e dos centros de saúde, despois de 'cinco anos de promesas incumpridas' por parte da Xunta, afirmou.
Fernández, na súa comparecencia perante os medios de comunicación, insistiu en que o consistorio 'non vai quedar pasivo' ante a actual situación de 'desmantelamento activo da sanidade' mediante a 'demolición controlada' dos servizos sociosanitarios.
Así, o rexedor socialista, quen deu lectura a unha declaración institucional que trasladará a diferentes colectivos, advertiu da urxencia de acometer as obras a escasas 'semanas para que Ourense perda os fondos europeos que ían ser usados como apoio para o Plan Director'.
Perante a 'gravidade' desta situación, avanzou que porá en funcionamento unha batería de medidas, consistentes no inicio dunha 'rolda de consultas cos colectivos da cidade para consensuar unha declaración institucional'.
Como un segundo paso, Fernández solicitará diferentes reunións co presidente da Xunta, Alberto Núñez Feijóo; a conselleira de Sanidade, Rocío Mosquera, e a xerente do CHUO, Eloína Núñez, para darlles traslado do documento previamente consensuado cos colectivos.
En terceiro lugar, avanzou que examinarán 'as implicacións xurídicas' que poidan derivar de que o solo non sexa destinado para os fins previstos, e cuxo atraso achacou a un 'rocambolesco sistema de adxudicación', que concluíu, dixo, cun concurso deserto, derivado 'dunha enxeñaría contractual difícil de entender'.
O rexedor socialista, quen lembrou que os terreos foron cedidos polo consistorio, esixiu a Feijóo o 'inmediato desbloqueo' das obras, alén de 'garantías' para a construción do novo centro de saúde do Vinte e Un e a 'restitución' das prestacións sanitarias esenciais, como é o caso de cirurxía pediátrica.
