Un total de 2.000 usuarios, 333 deles de nova incorporación recibiron asistencia durante o 2023 ao abeiro do convenio entre o Sergas e a asociación ourensá As Burgas, no marco dos programas de intervención e asistencia a persoas con trastornos aditivos. No caso dos novos pacientes, 228 foron homes e 105 mulleres. De todas as patoloxías, o alcoholismo é o “primeiro motivo de tratamento en condutas aditivas en Ourense”. Así o indicou o conselleiro de Sanidade, Julio García Comesaña, no acto de renovación do convenio de colaboración entre ditas institucións. “Temos que tratar ás persoas con adiccións, sobre todo o alcohol en etapas agudas e máis a prevención”, expresou Comesaña.
O responsable da sanidade galega e o presidente da Asociación As Burgas, Gerardo Flórez Menéndez, firmaron onte un acordo que contribuirá, entre outros, ao financiamento dun programa orientado á prevención de recaídas de pacientes previamente estabilizados, ou ao desenvolvemento do programa “Conta Contigo”, destinado a persoas que estiveron recluídas e en proceso de reincorporación social.
No acto de renovación do convenio no que tamén se contou coa presenza do xerente da Área sanitaria de Ourense, Verín e O Barco de Valdeorras, Félix Rubial, aproveitouse para achegar outras das patoloxías máis tratadas na asociación. Ademais dos problemas de adicción co alcohol, tamén se suman ao pódium os tratamentos e programas para axudar ás condutas aditivas relacionadas co xogo e o tabaquismo. “Temos programas específicos para cada problema e esta nova renovación do convenio é un orgullo e nos anima a seguir por este camiño”, expresou Flórez.
Financiamiento
Neste acto de renovación, o Servizo Galego de Saúde prometeu achegar unha partida económica de 221.529 euros para o financiamento das actividades que realiza esta asociación. Con esta achega, a Xunta de Galicia pretende incrementar este ano en máis de medio millón de euros o investimento dos convenios para o desenvolvemento de programas de asistencia sanitaria especializada dende un enfoque biopsicosocial para axudar a que, na actualidade, as adiccións teñan un tratamento multidisciplinar e personalizado segundo conveña.
O Executivo galego asinou nove convenios de colaboración entre o Servizo Galego de Saúde e outras entidades sociais para a asistencia a pacientes con trastornos relacionados con adiccións, até acadar un total de 7.764.100 euros en achegas.
