A aldea modelo do Covelo, no concello de Taboadela, lucirá un aspecto renovado nas próximas datas
O Concello de Taboadela anunciou recentemente a concesión dunha subvención para a renovación das estradas e a execución dunha nova rede de saneamento e depuración de auga, dotando de servizos a esta aldea que pretende ser un referente en materia de produción sustentable e loita contra o reto demográfico. O proxecto ten un orzamento de preto de 115.000 euros e a subvención concedida é de 98.000.
A actividade que se desenvolverá nesta aldea modelo será a gandaría en extensivo, podendo especializarse no vacún de carne, gando porcino, ovino e caprino. Ademais tamén haberá unha actividade secundaria de cultivos leñosos, como pode ser a plantación de árbores froiteiras e de castiñeiro para froito, do que se alimentarían os animais do complexo.
