O Goberno local de Ourense reclamou neste xoves que se proceda 'de forma inmediata' ao arquivamento da causa 'ou que impute formalmente os acusados', por presuntas irregularidades no desenvolvemento do servizo de axuda a domicilio, 'para rematar coa actual situación de indefensión' en que se achan os supostos implicados.
Nun comunicado, o Goberno local criticou 'a demora' do Xulgado á hora de adoptar unha resolución relativa á investigación existente sobre o servizo de axuda no lar, que xestiona a tenente de alcalde, Marga Martín.
No auto de 35 folios, o titular do Xulgado de Instrución 2 de Ourense, Antonio Piña, aprecia indicios de irregularidades na xestión do servizo, que poderían apuntar a malversación continuada e estafa, así como a falsidade de uso de documento mercantil.
O Executivo municipal expresou o seu 'total apoio' á xestión da concelleira de Benestar Social, Marga Martín, e insta a Xustiza a 'pór fin á indefensión que está padecendo, procedendo ao arquivamento da causa ou a unha imputación formal que permita á concelleira defenderse'.
Na nota, critican que todos os investigados están a ser tratados 'como delincuentes, sen a máis mínima posibilidade de se defenderen', ao tempo que lamentan a 'presunción de culpabilidade que se xerou neste procedemento', iniciado a partir dunha denuncia dun partido político, engaden, 'con intereses na oposición municipal'.
Fontes municipais achacaron ademais esta situación a 'unha confrontación entre empresas privadas nacida dunha disputa entre dous xestores'.
O maxistrado que leva o caso resolveu continuar co procedemento penal, en fase de dilixencias previas, e chamará para que declaren novas testemuñas, entre elas, a técnica da Administración xeral do Estado, Cristina Feijóo, e o ex xefe dos Servizos Sociais, Juan José Monedero, en calidade de imputado.
